Jai paregabea

Urtez urte Almadiaren eguna birsortzen da. Jai hau, egurgintzan eta ibaitik egurra garraiatzen aritu ziren gizonak eta emakumeak omentzen dituena, Pirinioetako baloreak aldarrikatzeko modua ere bada.
Inoiz baino gehiago eskerrak eman nahi dizkiegu jaia aurrera eramaten laguntzen duten ehunka lagunei: beteranoengandik almadiak nola egin eta garraiatu ikasten duten gazteei, herri-dantzen antolatzaileei, latsariei, aparkalekuak prestatzen dituztenei, musikaz eguna alaitzen dutenei, postuei eta adin guztietako jendearentzat jarduerak egiten dituztenei. Haiek dira Almadiaren eguna, haiena da.

Onki xin denoi Erronkaribarko, Zaraitzuko eta Aezkoako almadiazainen izenean. Ezka ibaian Almadien jaitsiera ikusi eta gozatuko duzue, eta bestelako jarduerak ere izanen dituzue, Burgin egun ahaztezina bizitzeko: artisau-produktuen azoka, Erronkari Jatorrizko Deituraren gaztaren azoka, Urrezko Almadia emateko ekitaldia, txikientzako puzgarriak, musika, dantzak, txarangak, Almadiaren Museoko bisita, herri-bazkaria. Almadiaren egunean zuen zain izanen gara! Pirinioak gozatu!
Onki xin!!