Igande honetan, hilak 29, “Burgi, lanbideen herria” ibilbidean mugarri berri bat jarriko dugu. Oraingo honetan, zenbait berritze-lan burutu dira ibilbidea ikusmen, mugikortasun eta entzumen arazoak dituzten pertsonentzat ibiltzeko erraza izan dadin.

Azkeneko urteotan ibilbide hori prestatzen lagundu duzuen boluntarioak eta Burgiko herritar guztiak gonbidatuta zaudete igandean, 12:00etan, eginen den inaugurazio-ekitaldira. Honetara, Ingurumeneko eta Lurraldearen Antolamenduko zuzendari nagusi Eva García Balaguer eta La Caixa fundazioko ordezkariak –egindako lanen babesle-, bertaratuko dira.

Panel berriak jarri ditugu braillez idatzitako testu laburrak eta web orri berriarekin estekatzen duen QR kodeak gehituta. Gainera, orain web orria irisgarria da itsuentzat, eta gorrentzako argibide-bideoak izanen ditu. Bestaldetik, bandera berriak egin ditugu eta ibilbidean soka bat paratu dugu ibilian laguntzeko. Eta datozen hilabeteotan dena hobetzen jarraituko dugu.

Zuen zain gaude. Eskerrik anitx denoi urtetako lan eta laguntzagatik.

Gaur egun Burgira etortzen den bisitariak lehengo garaiak gogora ekar ditzake harginen maisu-lan den Erdi Aroko zubia zeharkatuta; tamaina errealeko almadia ikus dezake, almadiazainek ibaian eta basolangileek mendian egiten zuten lanaren ikur; ikatz-txondorra egiteko zein ikatza lortzeko modua eta antzinako ogi-labe bat ezagut ditzake; herrian berreraiki zen elur-zuloan elurra gorde ahal izateko erabilitako adimena miretsi; karobian karea lortzeko prozesua aurkitu; edo antzinako zerrategian makineria berezia ikusi.

Lanbideen birsortze-lan bakoitzak badu bere informazio-panel irudiduna. Horrek funtsezko balio erantsia ematen dio antzinako bizibide eta jardunbide bakoitzaren ezagutzan sakontzeko. Argibide didaktikoei esker, bisitariak lanbide bakoitzaren baldintzen gogorra hauteman dezake.

Gure iraganeko ohiko jardunbideak zabaltzeko asmoz, berriki ibai bazterrean beste panel bat jarri da, oraingoan latsarien oroimenez. Horrela, emakumeei arropa garbitu eta zuritzeko hartzen zuten nekea aitortuko diegu. Emakume haiek ibai bazterrean makurtuta arropa igurzten, jantziak xukatzen eta izarak bihurritzen, jantzi bustien balde astunak gainean zubia zeharkatzen…

Gaur egun desagertu diren beste lanbide batzuk izan ziren. Haiek birsortzea ezinezkoa da, haien ezagutza eta oroitzapena biziraunaraztea, aldiz, bai: zuzigileak, koilaragileak, teilagileak, latorrigileak, espartingileak, petrikiloak, ahuntzainak…

Behin betiko joan zitzaizkigun arbasoen lanbide eta belaunaldi haiek. Haiei, gaur egungo gure bizimodu erosotik, lanaren merezimendua aitortu eta beren nekeengatik gure miresmena erakutsi nahi diegu.